الرومنسيات النتيّه .. خوارب بيتيّه .. للأزواج في السعودية

تعالو نسولف على هالمطر والجو الحلو "وجه شايب عازم أخوياه وجالسين بالحوش يشربون شاهي ويسولفون سوالف خاثره "





قبل شوي تسولف لي هيا بنت أختي " ترى هيا بنت اختي في ثاني ثنوي ماهي عجوز بس مسمينها على جدتها "

برايفت هيونه :

أحتسبي الاجر ان شاء الله يصير أسمك بالجنه حلو




السالفه أن وحده قرت في النت .. فاجئي زوجك لكي لايخرج ليلة الخمس ويلصق فيك لصقة عنزروت


زبدة هالموضوع النتي ّ ,, ان الحرمه تشغل بخار بالبيت

وتلبس وتسوي نفسها فراشه

عاد انا تخيلت نفسي رجال .. وبلاني ربي بوحده سمينه وسمراء .. وفوق كذا شينه

وتتميلح وتسوي ذا الحركات ..

وش السوات أصارحها ؟؟! ...ولا أعيش بكوابيس وأحتسب الاجر عند اللي مايضيع عنده شي

..

هالبنت اللي قرت الموضوع جازت لها فكرة الفراشه .. وقالت بسويها الله لايعوق بشر

عشان ماتزيغ عين زوجي ويروح منّـا وإلا منـا

عاد الرجال اذا تزوجو انهبلو زياده ...

وقالت لزوجها فلوني <- فلان بس انها دلعته ذاك الوقت .. اطلع برى رح اي مشوار عندي مفاجأه

نزل المحروس من الجناح ونسى يسكر الباب .. .. وراح سلم على امه وقال انه بيطلع ..

لانهم ساكنين عند اهله ..

ربع ساعه .. وانكتمت الام ... حست الوضع ماهو طبيعي .. وانعدمة الرؤيه بالبيت


طلعت فوق .. وهي خايفه .. وفتحت الباب .. على زوجة ولدها .. قالت اكيد الحرمه سوت بنفسها شي لاني قبل يومين هاوشتها على عباية الكتف وبناتي ماقلت لهم شي

عاد بهذي اللحظه الزوجه تحسبه زوجها اللي فتح الباب ..

وسوت نفسها فراشه .. وتطير عنده .. وتحضنه

بس اكتشفت ان الطرف الاخر فيه اشياء رخوه مو طبيعي .. ولما ركزت لينها الخاله


طاح وجه البنت .. وتابت بعدها تتميلح .. وخربت مفاجأتها .. وجاتها ردة فعل عكسيه


والخاله قالت لولدها وش رايك نخطب لك وحده ثانيه .. شكل حرمتك ماهي صاحيه .. حسبي الله على اهلها غشونا



*

*

*


خلصنا من سالفة هيا نجي لسالفة وحده أعرفها زين إما زين " كيفي بس وانا اتكلم إماراتي "


قرت برضوا من النت .. موضوع .. هالموضوع شيقوووول

يقول إذا دخل زوجك الحمام .. خففي دمك وأدخلي استهبلي عليه

أعجبتها الحركه

وتتنظر بس اللحظه اللي بيدخل فيها ..

ولما دخل ..

ودخلت وراه ..

ويلعن اصل اصلها .. يابنت الكلب اطلعي

حتى بالحمام الواحد ما ياخذ راحته

وبعد جتها ردة فعل وقعها مؤلم .. ماتدري تزعل وإلا تسوي الوضع عادي

ومن برودة وجهها جايه تقولي السالفه

ومن قلة ادبي جايه اكتب لكم السالفه

بس ترى صرحت لي بالنشر

*
*
*


طيب آخر سالفه ..

مره وحده .. عاد هذي حركتها عاديه ... يعني أنا ممكن أسويها مستقبلا

حاطه على السرير ورد مجفف وناثرته ع الارض


ودخل زوجها فيه نووم .. وجلس يهاوشها .. وش هالقذاره يالله أكنسي






مايستفاد:

2 _ وجوب أخذ العظه والعبره من الأمم السابقه