( أنــا وعزيز .. وثالثنا الحب ).. (ما الحب الا للحبيب الاشهبي)

---

^^

من الفسقه حاطه عنوانين لموضوعي ...

توجيهات قبل قراءة الموضوع :

1- ممنوع دخول ذوي العقول الثقيله .. لان الموضوع لن يروق لهم
2- هيئ عقلك باي وقت ممكن اتكلم فصيح وعامي وعادي لو قلبت انجليزي أو ايراني
3- تربعو على الكنب وانتم تقرون الموضوع
4- للبنات إذا كنتي لابسه طوق والا شي على شعرك فكيه .. مو اذا صكك راسك تقولي موضوعها يصك الراس
5- يفضل قراءة الموضوع في مكان خالي من الكائنات الحيه بانواعها يسوده جو من الهدوء والطمئنيه
6- يافضيكم وانتم تقرون توجيهات يقالكم بتمشون عليها
7 - يالله خلاص نبدا
8 - بدينا





بين الدم والشرايين واغشيه من هنا وهناك وشحوم ولحوم عشت طفولتي .. كنت علقه صغيره في بطن امي لازالت اذكر ذالك جيدا كنت قبل الاسبوع الرابع فالتها مره .. واتمشى بجسم امي منيره .. عثت في جسمها فساداً .. كنت اتمشكل كل يوم كم خلاياها وكريات دمها وانسجتها ... كانت جدتي تقول وحام .. والحقيقه يجهلون السبب ... فاعراض الوحام كلها من بثارتي وخرابي الي ما انتهى لين كبرت وصرت حرمه بالشهر الثالث
كان في اصنصير ( الحجاب الحاجز يسمونه بالعلوم ) طلعت معه للدور الثاني على يميني شفت شي يتحرك .. والكريات الحمرء تركض له وتدخل وتطلع .. استانست مره قلت اخيرا ركبو بجسم امي ملاهي ... قربت منه وسألت وحده من الكريات الحمراء وش ذا ؟

مسكتني مع علباي تتفحصني تحسبني فايروس تبي تحاربني .. لما عرفت اني جنين فهمتني ان ذا قلب أمي( يالبييييييه )... دخلت قلب امي لقيت صورة ابوي معلقه ... وقتها كنت اول جنين يشوف شكل ابوه قبل يطلع من بطن امه ...
ولقيت صورة ابيض واسود عجوز طخما وعرفت انها جدتي .. وحبيت راسها بالصوره وقلت لها كل عام وانتي بخير ( ماحب اسلم بدون مناسبه )


ولقيت جنبها صورة شايب محني لحيته ومعاه عصا ويتفرج على قناة الساحه وعرفت انه جدي ودخلت داخل وتعرفت على كل الي تحبهم امي .. فيه صوركثيره ..( وقتها اطلقت على امي لقب ست الحبايب لانها تمشي وتحب < هذي الي فاهمه )
.بس الي يقهر اني مالقيت صورتي ... يعني كنت ولاشي بالنسبه لهم مابعد عرفوني اهلي .. كنت نكره

جاني بعدها حماس ابي اطلع من القلب فوق واطل على الناس من فم امي والا اذنها ولا عينها ابي اشوف لي مخرج ... ابي اشوف ذا الحياة الي اعوذ بالله طقاق عليها العالم ومذابح عشانها هي تسوى الواحد يطلع لها .. والا يلف على رقبته الحبل السري وينتحر شنقا ً


مشيت لقيت اصنصير ثاني بس صغير .. ( حنجره اسمه بكتاب القواعد هذي المعلومه ) رقيت معه ..



ماردني الا لقمة رز بغيت اروح غلطه .. ماصدقنا صادفنا الحظ وصرنا جنين


.. نزلت لبطن امي مسكتني وحده من الخلايا قالت تراك بالاسبوع الرابع بتكبرين وانتي هايته .. روحي لمكانك يالله ترى مايكفيتس الا هو ( مشكله الغيره ودها تصير جنين مثلي لكن هيهات هيهات )


نزلت لبطن امي وحطيت راسي على البنكرياس ونمت .. البنكرياس اريح مكان للانسداحه ( وهذي معلومه لكل جنين جالس يقرا الموضوع )

وانا نايمه كنت متحمسه مره متى يجي بكره عشان أكبر ( الله يذكرني بالخير كنت شعلة حماس حتى وانا نايمه )

صحيت من النوم لقيت طالع لي عمود طويل كانه أنتل .. خفت اني اطلع تلفزيون واسود وجيه اهلي .. بس اما لو اطلع راديو كان التفكير يؤرقني تمنيت اراسل سندنس تسوي لي موضوع بالعياده بيوزر مايؤرقنا .. لكن للاسف بطن امي مافيه نت

بس اشوى صار عمود فقري .. وطلعت لي اعصاب وخلايا ..
الله يالدنيا امس اسولف مع الخلايا واليوم صارت فيني ولاعاد اقدر اكلمهم صرت كبيره معاد يسمعوني ولا عاد اسمعهم

وطلع لي مخ وراس كبير تقريبا كبر راس فرابي الله يأجرها بما ابتلاها ممتد من نفس العمود ذاك.. بس مابعد طلعت اطرافي ( من الي يقول برصي ؟ ) ... وبنفس اليوم صارت عندي وساده .. تكون السائل الاميني .. وصرت اتوسدها دايمن .. وضايق صدري ان بجلس هنا 9 شهور .. بس الحمد لله عدت بسرعه

بعدها باسبوع ( الاسبوع الخامس )

.. نفس العمود طلع منه عظام لظهري .. واول ماطلعت لي عظام .. ناديت كريات الدم يهمز ظهري ..

بعدها تخيلو وش طلع لي طلع لي قلب من الوسط ... أول ماطلع لي القلب كنت متحمسه احب .. حبيت امي .. وانطميت

بعدها طلع لي معده .. وصار عندي حبل سري أكل مع امي ..
كنت ارفس ابيها تغير الرز حامت كبدي منه .. بس مافهمتني للاسف ابي باسكن ابي مكرونا ابي ساندوتش .. بس مافيه امل ... وكله كوم واذا كلت مثلوثه كوم ثاني والله ياسعوديين عليهم اكلات ويقولون ليه الكلسترول والضغط والنقرس والسكر والسكه .. بلاه من اكلكم .. الجريش لحاله وجبه والرز لحاله وجبه وبعد القرصان ... وهم يسوونها طبقات ودربدب للبطن .. ويختمونها بكاس لبن .. ودي اسوي حمله نفس حملة انا استطيع واسميها ارحم بطنك .. واستضيف استشاريين


( الاسبوع السابع )

طولت صار طولي 0.6 سم ...( بدون كعب )

طلعت لي كبد وكليتين .. .. وطلعت لي يد و ذراع ... او ماطلعت لي أصابع سويت بيس
بعدها طلعت لي رجول .. وحطيت رجل على رجل ... وهالمره الدور على الكريات البيضاء تهمز رجلي

كنت فرحانه مره وانا اشوف نفسي اكبر بسرعه .. وتطلع لي اشياء جديده

وبدت تطلع ملامح وجهي .. عيون وخشم وفم


مرت الاشهر ... بسرعه .. أكتشفت في آخرها ان عندي أخو توأم معي يشبهني مره .. كنت احسب ببطن امي مرايه ..
كان اخوي داج مره .. اخلاقه خربانه .. كان يعسل بالحبل السري ويسهر دايم .. والمشكله انه طاح بذا الحركات على كبر بالشهر التاسع .. اسوء شي الدشره على كبر

ودايم أقوله ماتخاف الله يعاقبك وتزلق من يد الممرضه اذا طلعنا ويفقس راسك ..
الشي الي ما انساه اني كنت مطوعه ببطن أمي وانصح اخوي واستانس اذا اذن مسجدنا .. واذا اذن الفجر ارفس بطن امي عشان تقوم تصلي ... كنت متحجبه بالمشيمه
الظاهر اذا شيبت برجع مطوعه ان شاء الله من شب على شي شاب عليه


7-6

كان يوم الخروج للحياة ..
طبعا من التعب أغمى علينا ( وكنت أول مولود يغمى عليه من التعب ) ... حتى ان الدكاتره احتارو انا الي ولدت امي ولا امي الي ولدتني ...

صحيت بغرفه زرقاء ..مليانه اسره صغيره ونايمين عليها فطافيط صغار .. وممرضه لابسه ماسك .. جلسنا نذب عليها انا واخوي .. نقول وش الي مثبت الماسك ومافيه خشم

بعد مده جاء واحد يطل بوجهي .. عصل مره ووجهه كانه طعوس .. واسمعه يقول يازينهم عيالك يشبهوني .. .. )

التفت على اخوي قلت له وش هالحياه الي ذا اول ينعاف تاليه .. خلنا نطب من السرير مدامنا صغار وننتحر على الاقل نصير عصافير جنه ونشفع لاهلنا .. ( كل ذا السوالف بلغة الاجنه .. يعني زي سوالف النمل مع بعض محد يفهم ولا يسمع )

قالت له امي لا اسمعك تقول ذا الكلام لهم اذا بدو يكبرون .. مابي عيالي يتعقدون .
وهي وياه لين طلعو بنتيجه مرضيه للطرفيه
والي هي ان خالي كان مزيون بس الزمن لعب فيه وعوامل التعريه خلت وجهه يروع .. واستشهدو بالمثل المشهور ( لن يصلح العطار ما افسده الدهر ) ...

فترة الطفوله ...
كان عمري 6 سنوات ... والجدير بالذكر اني ما ادري اني بنت ولا افرق بين الولد والبنت ولا اعرف ان البنت اذا كبرت تصير حرمه والولد اذا كبر يصير رجال ... كنت ماشيه على البركه .. وعشان الرخص ... كان ابوي يشتري لنا طاقة قماش ابيض وامي تسوي لنا ثياب انا واخوي ..
وكانو يقصون شعرنا كاريه فرنسي .. يوم فسقنا صرنا نقص كبوريا عند حلاق منصور .. اطلق حلاق بالحي


مره من المرات .. بعد ماطلعنا من البقاله شارين عصير ابو نص والنص الثاني فش فاش .. الله يديم الرخص مادفعنا الا ريالين ...

جلسنا على عتبة الباب وجالسين نتفرج على دوري الحاره ..
نادونا العيال وقالو لنا تلعبون .. .؟؟

طبعا وافقنا لكن شرطو علينا نختار القاب ...
اختارو لاخوي ابو السرا .. واختارو لي لقب فلّو .. ( كنت افت بالكوره ويشجعوني فلّو لي لعب سبب للخصم ربشه )
وكان فيه واحد اسمه عزعز .. لافت نظري وشخصيته معجبتني .. وبين الشوطين لازم يحط يده على خصره .. وانا اقلده ... من اعجابي فيه ...

وكل يوم واحنا على ذا الحال .. نلعب نلعب واذا خلصنا .. شرينا سنتوب ... كان عزيز ينفخ السنتوب ويفقعه ... وانا اقلده .. عاجبني ذا الولد حد الثماله ... رايحه فيها مع حركاته << الله والحركات


طبعا امي ماجابت خبر أهم شي انها مفتكه من حنتنا وصجتنا بالبيت ...




بعد سنه .. اجتمعنا على الغداء .. رز احمر من كثر الصلصه ومويه .. وسلطه كبار جرير .. وكنت مسمتعه بالصوت الي تطلعه امي من الجرير والخيار وهي تخلطهم مع الرز ... وقطعت استمتاعي بعد ما ارسلت اللقمه .. قالت ترى لازم ندخلكم المدرسه .. وانت تدري بمدارس العيال وهي بمدارس البنات .. جلست اصيح وقمت من السفره .. مالهم حق يفرقونا ...

رحت للسطح.. وجلست اطل على الحي واتفرج وانا اصيح .. واشوف عزعز يلعب .. قالت مالي الا اروح افضفض لعزيز يمكن يساعدني ...

لبست ثوبي او ثوب اخوي مدري .. المهم اني نزلت لعزيز .. لقيته يلاحق قطاوة الحاره ... اعجبتني اللعبه ونسيت السالفه .. مسحت عيوني وخشمي بعد بكم ملابسي ورحت العب معه نلاحق القطاوه بالزبيريات ...

لين اذن المغرب


يوم اذن المغرب دخلت بيتنا ... لقيت ابوي يقول دراسه ماهم بـ دارسين .. اوديهم للكتاتيب المهم يعرفون يقرون ويكتبون ... وخليهم مع بعض شوفي وشلون دايم مع بعض كنهم فرخ جني لو درسنا كلن لحاله بتموت روح الاخوه القويه الي بينهم ...


طاب خاطري .. وارتاحت سريرتي ( سريرتي يعني داخلي ماكنّا نعرف شي اسمه سرير ذاك الوقت ننام بفرش وتخب )
وخلدت الى النوم ...



اصبح الصبح ورحنا انا واخوي .. وعزيز .. يعلمونا نقرا ونكتب ..وصرنا نحل واجبتنا سوى ..
كان جدولنا اليوم نطلع من الشيخ بعد مايعلمنا ...
ونراكض بالحاره ..
كنّا متعددين الهوايه

% نلعب كوره كل عصريه
% نلاحق قطاوة الحاره
% ندرس ونقرا
% نسرق من البقاله
% نلعب حبشه
% ندخل المسج وناخذ المايك وننشد


وفوق كل هذا مانتعب .. نظامنا بالحياة لايوقف ...


بعد خمس سنوات ..

صار عمري 12 ..
صرت اميل لعزيز ومزلبه باخوي .. . الفطره جارتني على وجهي .. وفي يوم من الايام وهي نقطة التحويل بحياتي ( وينك عني ياسعود الدوسري ) صحيت من النوم .. كان عندنا مرايه طويله .. واشوف شكلي بالمرايه وجسمي .. ماش .. ضاق صدري ... وجلست افكر وشهو منه صرت كذا .. ليه جسمي تغير .. افرك عيوني ابي استوعب بس هوهو ماتغير

ووش يقولون العيال ان شافوني كذا ؟


طلعت من البيت وانا انا ضايق وبالي ضايق وجويّ ضايق ضيقن كايد نفسي ملت وروحي ولت وعيني هلت

جلست على العتبه مكاني المفضل وارمي حصى على الرصيف لفت نظري الباكستاني الي يخيط .. لابس سديري اسود .. طرت لي فكره ممتازه .. افصل لي سديري مثله .. ولاحد ملاحظ شي .. رحت له وسألته هاه صديق كم فصل زي انت كذا سديري ؟
قال اوووه فلّو ... انا يسوي لك مجانا ..

حمدت ربي ...

وصرت دايمن البس سديري الاسود .. ويذبون علي بس عادي هماهم يلعبوني معهم ..
طلعت انا وسديريي من البقاله وفرشت على عتبتها كرتون .. وجلسنا انا وعزيز

أنا : وش رايك نسوي انفسنا شحاذين ؟
عزيز : لا مهبول انت يافلّو ؟ كل الحاره يعرفونا

أنا : طيب تخيل تعيش في البقاله وش تسوي
عزيز : بخلصها بيومين اصلا لين كبرت بسوي لي بقاله


عزيز ينظر الى السديري بغرابه : فلّو وراك متغير ؟
أنا : وشو مع السلامه بكره الصبح جهزّ النبيطه ..


دخلت بيتنا .. وانا باحله بعمري .. أصارح عزيز في الموضوع ؟ والا اروح اقول لاخوي ؟ والا اسوي رجيم

وانا جالسه أفكر نادتني امي .. وكان هذي اول مره بحياتي أتكلم انا وامي لحالنا ..

كانت صاعقه ومصيبه .. كلامها ساكاكين يقطع جوفي

قالت لي تراك يابنيتي بنت والبنت غير الولد وكبرتي وانتي هايته .. من اليوم ورايح ماعاد فيه طلعات ولا روحات ... وووو واستمر الكلام
وانا اسألها يعني بصير زيك يمه منيره انتي وحالتي حصه ؟
قالت ايه
واخوي يصير متى يصير زينا .؟

قالت لا اخوك يصير زي ابوك
فهمتني امي كل شي ... وبالصعوبه لاني غبيه يبي لي ساعات مكثفه
لما فهمت رحت لفراشي وجلست اصيح واصيح واصيح واصيح .. كلت تبن في النهايه ونمت ..




طلع الصباح ... وجاء عزيز يطق الباب .. قلت مابدهاش لازم اكتب له بورقه وافهمه السالفه كلها واعطيه اياه

رحت مسكت ورقه وكتبت له:
عزيز صديقي الذي لم اصادق مثله في حياتي
لقد كنت نعم الصديق الي كلن يتمناه لكن السالفه صعبه جدا
عزيز انا اسمي ساره .. ودلعي سوير .. فلو مات انا بنت
خل امك تعلمك زي امي امس وشلون البنت غير والولد غير

ورميتها على سطحهم

بس طلع عزيز ذكي وعارف من زمان ان البنت غير والولد غير

أرسل لي رساله :
فقدتك يوم كلا" مع احبابه وانا مثل اليتيم اللي هموم القلب يخفيها اشوف الناس مبسوطه وكلن حوله اصحابه وانا ماني بحاسدها عسى ربي يهنيها

ورماها على سطحنا

أرسلت له :
احبك كثر ما قد صار .. احبك رغم ما قد صار احبك كثر ما دنيا الزعل والصد مهجوره احبك كثر ما تمطر بصدري من غلاك امطار احبك كثر ما صارت اراضي العشق ممطوره


أرسل لي :
بجي اتزوجتس مالي دخل لو اعرستي على غيري ذبحته





مرت الايام .. وحنا مراسل من فوق السطوح ..
عندما بغلت الـ 20 من عمري .. تقدم عزيز لخطبتي .. واقمنا حفل الزفاف والجدير بالذكر ان اصطحاب الاطفال مسموح ...



مايستفاد :

أشتقت للنهاية السعيده .. ومليت من الي يخلون الابطال يفطسون .. ابي اكسر هالقاعده