موضوع صغّير : السعودي & المتسعود ( ايقونة جدول مقارنه )

السلام عليكم

هذا الموضوع بمناسبة ان اختي تروشت اليوم .. من اول ماتخرجت وصارت عاطله معاد تتروش .. ومن هالمنبر اقول للملك عبد الله وضفوها تكفون عشان تتروش كل يوم ( طرت لي اهداءات السعوديين بالعيد اذا قالو اهني خادم الحرمين وهو ماجاب خبر )

والا ادعو انها توافق تعرس ( ويابخت من جمع راسين بالحلال ) لازم شي يجبرها تتروش .. والا ادعو ان كل يوم يجينا عيد


تصدقون اني مره من المرات أفكر بمقولة ( يابخت من جمع راسين بالحلال )
كنا في السياره انا وامي ... وساكتين .. رايحين للمكتبه << تشبع غريزة الفضول
وانا جالسه افكر بهذي الجمله لاني بنفس اليوم جمعت راسين .. بس مو ناس نملتين .. وانا طالعه قربت وحده منهم للثانيه بالمكنسه .. بس مدري هي ماتت والا لا .. المهم جمعتهم

وقاعده اقول .. وش معنى راسين ... ليه مثلا ماقالو .. زوجين ..
او جسمين .. ...

على انه لما فكرت شوي .. لين الجسم اهم من الراس
والدليل اننا اذا ذبحنا البرصي وانقطع بالنص .. راسه يموت على طول .. بس جسمه يتحرك ..
وغير كذا القلب بالجسم يعني الراس لو انقطع الانسان يعيش

<< هذي الي بتصير استاذه السمستر الجاي .. الله يعين الطالبات بعطيهم معلومات زي كذا .. بقلب روسهم ... بقولهم كل الي درستوه اول كذب




..


نجي للموضوع الصدقي ..

عشان تعرفون وتفرقون بين السعودي والمتسعود .. وانواع السعودي ..


أول شي المتسعود

المتسعود له نوعين ..
النوع الاول الي منتشر .. كيف تعرفونه ؟؟
ماهو شرط ان فيهم كل هالاشياء يمكن بعضها بس

1_ الشماغ .. يكون صغير مره .. تقريبا حجم الكف < حشاء فوطه ..
ويجي لونه أحمر فاقع .. مايل على البردقاني .. والعقال تحس انه حق اخوه الصغير ..
ودايم الشماغ لاصق على راسه ورقبته .. مابعد عرفو النشا

2_ دايم فنايلهم كت والكتوف السود باينه من ورى الثوب .. لان ثوبهم يجي خفيف يالله من فضلك دايم متهوين ماشاء الله وبرضوا مايعترفون بسراويل السنه ابد .. يلبسون السروال الصغّير ذاك ..
( وش علمانيته ؟ )

3_ اغلب الاحيان يقول ابي اتغداء ... تقوله وين اي مطعم .. يقولك لا من البقاله ( يجيك قنوع يعني .. ويتغداء كرواسون سفن داي مع عصير )

4_ فيه بعضهم يحسون ان الطاقيه مو لازم .. شعر وفجأه شماغ

لاتحاول تحتك فيهم ابد لانهم .. ينشبون مره .. اذا تبي تعطيهم شي والا ودك تسألهم أو تجاوبهم عن شي حط على وجهك ورقه واكتب فاعل خير لانهم اذا شافو وجهك دلو الطريق .. وكل ماشافوك بمكان جو يسلمون ..ويطرون بطريقه غير مباشره


أما النوع الثاني

هذولي دايم يطلعون بالدعايات .. ويجون طخمآآن .. ودي المس وجيههم اشوف فيه خلايا زينا .. والا ساده
يقدرون السكسوكه مره
اظن هذولي فيهم عروق اوربيه ...
ودايم وجيهم مغسوله بمرق .. ولايستحون ابد .. يسوون داعايات بامبرز .. ودعاية شسمه .. عادي عندهم .. مايقولون تنجرح رجولتنا .. والا وش يقولون عيال عمي




اما السعودي الصدقي .. له عدة انواع .. << هذولي الي بنعرس منهم

فيه الوسط .. يتبعون ( خير الامور اوسطها ) هذولي ماعليهم خلاف .. وتقريبا الغالبيه وسط ..
بس فيه فئه شاذه .. ..وهم الي بنعدد صفاتهم ..
الفئه الاولى انسب مسمى لهم ( أبناء الصحراء )

1_ دايم لابسين ثوب واذا غيرو لبسو ثوب نوم مقلم .. واذا قلت لهم البسو بدله كنك قايل البس مايوه .. حتى انه يزعل احيان .. ويقول الا الشرف والعرض لا تخربوني حدكم

2_ اذا كشخ وراح للفيصليه يلبس كنادر بيضاء مصقوله تلمع وتبرق وتجهر العين

3_ اغلبهم و الحلو فيهم دمهم خفيييييف مره

4_ لو تفتش جواله تلقاه مسجل اميمته ( الوالده ) وخواته رموز .. والا مسجلهم انجليزي .. يعني محد قاريهم اذا صارو بالانجلش وباقي اخوايه معايير

5_ اذا كانو خواته كثار .. تلقاه يكره الحريم مره .. ودايم يقول منيب معرس .. واذا شاف حرمه ودها يبيدها ببف باف ... وطموحه بالحياة .. انها تصير للذكور بس

واذا كان اغلب بيتهم شباب .. ماعنده الا ثنين والا وحده .. يصير مشفوووح على الحريم بشكل .. وعيونهم اغلب الاحيان تجي جاحضه من القز .. وطموحه ... يسافر للبحرين .. بس ماحصلت له


6 _ اذا جاء اطخم .. يصير خفيف دم واطخم .. وبنفس الوقت مايدري انه اطخم .. يعني مستحيل يتكبر على زوجته .. ويهايط عليها ويقول البنات من اول يرقموني .. ويدفوني بكتفهم عشان بلفتون نظري وانا ماشي بحالي بالسوق ..
ابدن ماعنده هالحركات ..على انه وش ملحه بس بالعكس دايم يذب على وجهه .. واذا خلص يذب على وجه زوجته

7_ دايم اسنانهم فيها مشاكل .. من قل النظافه ..



الصنف الثاني ..
هذولي يعني استغفر الله ودك تسكر عليهم بغرف لين يكبرون وتتراوح اعمارهم مابين ( 15 الى 17 )
يسمعون بالموضه ..
واي شي غريب ينفع والا ماينفع يلبسونه .. ويسوونه ..
ودايم داخلهم احساس انهم هاي كلاس
ولايطيحون بالشي الا اذا تركوه العالم ..
مثلا لما بطلو الناس كدش ... بدا يكدش شعرهم ..
وكل ماطاحو الناس بشي وبطلوه .. يبدون هم يطيحون فيه ..

هذولي اوجه لهم رساله .. واقول استريحو .. الله يريحكم دنيا وآخره





الي يعرف شي يكمل .. وانا بروح انام لاني صايره ( أبو سعد ) انام بدري .. ومن اصلي المغرب .. يبدأ يجيني نوم



تصبحون على دومات

ونشوفكم صدفه