.
حصه هذي صديقتي بسادس ابتدائي ... تستاهل اكتب عنها في ويكيبيديا ... ولو تلاحضون ... قصتي السابقه ( أفنان ولينا) كنت مدخلتها بالسالفه ... بس بتكلم عنها بشكل اوسع ... صحيح أن كتاباتي السابقه من خيالي وبنات أفكاري المتخلفات بس هذا اللي بكتبه كله واقع لايمت للخيال بصله بحكم عمل ابوي الله يرحمه سكنا يوم كنت سادس بمنطقه برى الرياض .. طبعاً البساطه اللي هناك خلتني أحسب ابوي ملك ... صدق ما أمزح كنت فاهيه .. واحسب ابوي ملك لانه الناس اللي هناك مره معطينا جونا ومحسسينا اننا شئ عظيم في هالمنطقه عشان عندنا ثلاث بيبان وبوابه وحديقتين < هذا مفهومنا للملك أول .
.. وكان عندنا زحليقه .. يسمونها ملاهي .. يجون العصر بزران ويقولون نبي نلعب بالملاهي اللي عندكم ... ومره سوت شغالتنا بطاطس مقلي وكاتشب ... واستانسوا مره وألفوا أغنيه ( كاتشب كاتشب ترم ترم) اول مره يذوقون الكاتشب أجل لو اننا حاطين مايونيز يمكن يألفون معلقات < ادري انها سامجه بس والله ما انكت قاعده اقول الصدق
يوم دخلت للمدرسه تعرفت على حصه .. .. يمكن أكثر مراحل حياتي ضحك هي مرحلة سادس والسبب هي ..
كان شعرها برتقالي من الحنا .. وخشمها منتفخ عشان مرحلة البلوغ .. هذا اللي اذكره من وجهها ... طبعاً لها عيون وفم بس ناسيه تفاصليها ..
أول ماسجلت كانت لافته نظري أحب اتفرج عليها اذا طفشت من الشرح .. واتمقل بحركاتها ..
يوم جا الترم الثاني .. واشوف حصه قاصه كاريه
.. وأجلس أروعها أقول ياويلك من الابلات ليه تقصين شعرك ... وخافت .. قالت اذا احد سألني ابقول شعري أحترق وقصيته ( ميب سهله تعرف تصرف ) لما قصت شعرها .. قررت تتغير جذرياً .. بنت الايه جايه محضّره الدروس كلها
... يوم جت حصة العلوم وبدت الاستاذه تشرح ..خربت عليها حصه الله يهديها حديثة عهد بالشطاره .. قبل تقول الاستاذه الكلمه تسبقها .. صارت شاطره مره عقب الكاريه
... كانها داشر يوم تطّوع تزمت.. وكان ذاك الدرس عن الربع الخالي .. واستاذة العلوم ماعندها بأحد تجرح الواحد وتزبد لنا ... يوم سبقتها حصه بمعلومة أن الرمال متحركه وتدفن كل شي .. قالت الاستاذه ... حصه اسكتي لاوديك للربع الخالي يدفنك انتي وشوشتك ...
.. صرت كل ما اشوف شوشة حصه الكاريه البرتقالي اضحك لين طردتني الاستاذه .. بعدين فجأه صرنا اصدقاء .. يازينا ايام الطفوله ضاحكه على شوشتها وصادقتني ومن هنا أنطلقت صداقتي معها
القبيح بشخصية حصه انها استغلاليه مثلا تقول بعطيك ستكر وعطيني ريال .. طبعاً مثل ماقلت لكم أول فاهيه صدقتها .. اعطيها ريال وتعطيني ستكر مخيس مره حتى اللصق من ورى فيه شعر صغير وسعابيل باين انه مستعمل .. بس اني حياويه وماقدر اواجهها واقول يالكذابه رجعي فلوسي
اكتشفت بعد فتره أن حصه بيتها قريب من بيتنا .. قلت لها وشرايك نروح ونجي سوى .. تعالي معي اوصلك لاتروحين مع الباص .. قالت يلله . طبعاً دايم اسئل نفسي اهل حصه وينهم ... احيان اشك انها عايشه لحالها وتقرر على كيفها ..
صارت تركب معي وننزلها ومره من المرات سوينا حادث بسيط .. قالت امشي نروح على رجولنا .. حصه يابنت الحلال وش على رجولنا بعيد البيت عن المدرسه .. قالت ماعليك أمشي بس ... ... مشاء الله عليها تدل مع ان المسافه مره بعيده ... انا الحين ما ادل بيتنا ...
السواق يهاوشني وحصه تقول ماعليك منه ... قلت يلله ياحصه امشي .. انا اثق بقرارتها مره احسها تصلح تصير أبوهم مره
... ونمشي وانا اصيح مثل اي طفل طبيعي وهي تهاوشني وتقول امشي بس وش يصيحتس الحين . .؟ قلت شنطتي ثقيله
<< أصررّف .. قالت هاتي اشيلها ... وتشيل شنطتي وشنطتها وتمشي لين وصلنا ... حجرتني عن آخر جدار وحطيت يدها على رقبتي .. رفعت يدي بقول لها استسلم .. قالت انطمي ونزلي يدك .. بس والله لو احد يدري اننا ماشين على رجولنا لاذبحك فاهمه 
؟؟قلت خلاص ما اعلم ... واروح لبيتنا واقلبها مناحه
.. واهلي يضحكون على وجهي ويقولون ان تعوديها بنعلقك عند الباب للعظه والعبره ... ومابقى احد ماعلمته .. وهي ساكته ماقالت لحد أبد ماكنها بزر أشبك ان متلبسها شايب في ذاك الحي ماكنا نطلع ابد امي تخاف علينا حتى انها تبي تلبسنا براقع زي عيال مايكل جاكسون
بس مره من المرات طليت من تحت الباب لين قدام بيتنا قطعه فاضيه يلعبون فيها كوره مباراة حواري ههههههه .. واتفرج عليهموانصعقت ...!!!
لقيت حصه تلعب معهم لا وبمريولها بعد ماغيرت الكلبه
يوم قربت تنتهي السنه حصه صارت مطخطه تشتري نصف المقصف .. وتطّلع الاشياء على طاولتها ...كأنها بسطه .. الله يرحم ايام اول عصير ربيع وساندوتش جبن منعفط من الكتب
جيت سألتها وش عندك صايره كذا ... قالت امي نفاس والناس يحطون بمهاد اخوي فلوس واسرقها
في نهاية الفصل رجعنا للرياض وانقطعت علاقاتي بحصه .. بس اتوقع انها اعرست وجابت عيال يشبهونها
تمت :)
ليست هناك تعليقات:
إرسال تعليق